«Реал Мадрид» клубының сенімді қорғаушысы Антонио Рүдігер бірнеше ай бойы сол аяғының тізе жарақатымен ойнап жүргені белгілі болды. Осы уақытқа дейін қолданған емдік шаралар нәтиже бермеді. Жарақат толық жазылмағандықтан, клуб дәрігерлері мен басшылық жақын арада футболшыға ота жасау мүмкіндігін қарастырады.
Чемпиондар лигасындағы жорығы аяқталған соң, команда жаңа маусымға жоспар құруды бастады. Осы маусымда бірнеше негізгі қорғаушының жарақат алуы команданың ойын деңгейіне айтарлықтай әсер еткені жасырын емес. Сондықтан да жаңа маусымда барша қорғаушылардың физикалық тұрғыдан толық дайын болғаны өте маңызды.
Ағымдағы маусымда Рүдігер «Реал» сапында 47 матчқа қатысып, 3 гол соқты және 1 нәтижелі пас берді. Сондай-ақ, қорғаушы 7 рет сары қағаз алып, агрессиялық ойын стилімен көзге түсті. Қорғаныстағы сенімді ойынымен танылған неміс ойыншысының денсаулығы алдағы маусымда команда үшін шешуші рөл атқаратыны сөзсіз.