Футбол әлемінің ең танымал бапкерлерінің бірі, қазіргі таңда Бразилия ұлттық құрамасын жаттықтырып жүрген Карло Анчелотти Испанияда салық төлеуден жалтарғаны үшін бір жыл шартты жазаға тартылды. Бұл үкім Испанияның қаржы органдары жүргізген тергеудің нәтижесінде шығарылды.
Айыптауларға сәйкес, Анчелотти «Реал Мадридтің» тізгінін алғаш рет ұстаған 2014–2015 жылдар аралығында, өзінің имидждік құқықтарынан түскен табыстарын толықтай көрсетпей, салықтан жалтарған. Испаниялық EFE агенттігінің мәліметіне сүйенсек, оның мемлекет алдындағы қарызы 1,2 миллион еуроны құраған. Ал өсімдер мен айыппұлдарды қоса есептегенде, бұл сома 1,5 миллион еуроға дейін жеткен.
Испания заңнамасына сәйкес, екі жылға дейінгі жаза бұрын сотталмаған тұлғалар үшін шартты түрде есептелуі мүмкін. Осыған байланысты Анчелотти нақты түрме жазасынан босатылады, алайда бұл оқиға оның абыройына және кәсіби беделіне айтарлықтай әсер етуі ықтимал.
Анчелотти әзірге бұл мәселеге қатысты ресми пікір білдірген жоқ. Дегенмен, футбол тарихындағы ең беделді және тәжірибелі бапкерлердің біріне мұндай құқықтық келеңсіздік көлеңке түсірмей қоймайды.