«Реал Мадрид» аргентиналық жас талант Нико Пасты командаға қайтару мүмкіндігін қарастыруда. Келесі аптада бұл мәселеге байланысты нақты келіссөздер жүргізілмек.
Естеріңізге сала кетейік, Нико Пас 6,5 миллион еуроға Италияның «Комо» клубына ауысқан болатын. Алайда, трансфер шартына сәйкес, ойыншының кейбір құқықтары әлі де «Реалға» тиесілі. Мадридтік клубта оны үш жыл ішінде кері сатып алу құқығы бар:
• 2025 жылы — 8 миллион еуро,
• 2026 жылы — 9 миллион еуро,
• 2027 жылы — 10 миллион еуро.
Нико осы маусымда «Комо» сапында жоғары деңгейде өнер көрсетіп, өз шеберлігін дәлелдеді. Ол 33 матчқа қатысып, жалпы 2524 минут алаңда болды. Осы уақыт ішінде 6 гол соғып, 9 нәтижелі пас берді — бұл 21 жастағы жартылай қорғаушы үшін өте жақсы көрсеткіш.
Мадридтік клуб ойыншының прогресін жіті бақылап отыр және егер осындай нәтиже жалғаса берсе, Никоның қайта «Сантьяго Бернабеуге» оралуы — уақыт еншісіндегі мәселе ғана.